Babā Yim
Name Babā Yim
Social Media @kaululoa
Age 48
Town/Moku Honolulu
Island Oʻahu
Leadership Category Education
Nominated by Noelani Goodyear-Kaʻōpua, ʻIlima Long
Share with us a little about yourself and what you do. ʻO ke poʻokumu au no Ke Kula Kaiapuni ʻO Ānuenue. Ua hoʻomaka koʻu aʻo ʻana i laila ma kahi o ʻiwakālua kūmālua makahiki aku nei ma ke ʻano he kumu kōkua. I kēia manawa hoʻi, kākoʻo au i nā kumu a me nā limahana o ke kula i ka hoʻonaʻauao ʻana aku i nā haumāna mai ka papa mālaaʻo a i ka papa ʻumi kūmālua ma o ka ʻōlelo a me ʻike Hawaiʻi. Noke mau mākou ma Ānuenue e mālama ʻia ke keiki ma kona mau ʻano a pau, ma ka palekana o ke kino, ka hoʻoulu i ka naʻauao, a me ka maluhia o ka ʻuhane.
Why is the work that you do important to you? The community? He mea nui ka hōʻola ʻana i ka ʻōlelo Hawaiʻi no ka mea he ala nō ia i hiki ai i ka ʻike a me ke ʻano o nā kūpuna o kākou. Me ia ʻike kākou e kūkulu hou ai i ke kaiaulu ā paʻa. He lāʻau nō paha ka hoʻonaʻauao e lapaʻau ʻana i nā mea e hoʻopilikia mau ana iā kākou. Inā hoʻi kākou i ka ʻōlelo, ka ʻike, a me ke ʻano kūpuna, e hoʻi pū ke ea o ka lāhui.
Share with us the qualities of leadership you admire and how you express those in your life. He mea nui ke aloha no ka poʻe alakaʻi. Paʻakikī ke alakaʻi ʻana me ka ʻole o ka ʻōpū aliʻi e kahiau aku i ka poʻe. Noʻu iho nō ma ke ʻano he poʻokula ma Ānuenue, e mālama au i nā haumāna o ke kula me ke aloha makua. Hoʻāʻo nui au e hōʻike aku i koʻu aloha nui iā lākou i kēlā me kēia lā ma ke ʻano e pono ai. Inā he pūliki, pūliki ʻia nō. Inā he nuku, nuku ʻia nō. I loko nō o ka nani a me ka pupuka, o ke aloha kekahi pou kihi o ka hale o ke alakaʻi.
Who has inspired you to do the work that you are doing? ʻO ʻAnakala Eddie Kaʻanānā ke kumu hoʻohālike nui no koʻu ola a me kaʻu mau hanana ma ke kaiaulu. He alakaʻi nō ʻo ia no ka lāhui. Hāwanawana kona leo, he mana nui naʻe kāna mau hana. Aloha nui au iā ia.
What is one word that describes something you are excited about for the lāhui? Ea
What is one word that describes a pressing issue that is facing our lāhui? ʻEha