Kaniaulono Hapai
Name Kaniaulono Hapai
social media @al0ha.bab0
Age 15
Town/Moku Wainaku, Hilo
Island Hawaiʻi Island
Leadership Category Culture
Nominated by Malia Nobrega-Olivera
Share with us a little about yourself and what you do.
Aloha, ʻo Kaniaulono Hāpai koʻu inoa. He ʻumikūmālima oʻu makahiki a he kama no ka ua kanilehua o Hilo nei. Hele au i ke kula o Ka ʻUmeke Kāʻeo ma Keaukaha, Hawaiʻi. Ua hānai ʻia au ma ka ʻōlelo Hawaiʻi a me ka hoʻomau ʻana i ka puolo Hawaiʻi. Nui ka ʻike waiwai e hoʻomau ʻia nei ma o kēia mea o ka hīmeni mele Hawaiʻi ʻana. Hīmeni au me koʻu ʻohana i nā mele e ola ai ka lāhui a me ka ʻōlelo o kēia ʻāina.
Why is the work that you do important to you? The community?
Koʻikoʻi ka hoʻomau ʻana i nā mele Hawaiʻi no ka mea he moʻolelo ko kēlā me kēia mele a ma o ka hīmeni mau ʻana e ola ai kēia mau moʻolelo no nā hanauna e hiki mai ana. He mea hoʻohauʻoli ke mele noʻu a he mea e ʻoliʻoli maoli ai ka poʻe o ko kākou lāhui.
Share with us the qualities of leadership you admire and how you express those in your life.
ʻO ke alakaʻi maikaʻi ka mea e hōʻike ana i ke kākoʻo maoli i ka poʻe. Ka mea e komo mau ana i nā hana me kona kaiāulu. Ka mea hoʻolohe i ka manaʻo o ka poʻe. He kanaka hōʻike mau i ke aloha no ka ʻāina a me ka lāhui. Ma ke kula, he alakaʻi wau i ka wā mele. Kōkua wau ma ke aʻo ʻana i ka hoʻokani pila a me ka ʻimi ʻana i ka leo kū launa like. He mea nui ka hui pono ʻana o ka leo, ka pana, a me ke kani pualu ʻana o nā pila. Pono wau e komo mau ma ka hīmeni ʻana a me ka hoʻokani ʻana i hiki iaʻu ke ʻike i kahi e ikaika ai a e nāwaliwali ai koʻu poʻe hoapapa.
Who has inspired you to do the work that you are doing?
ʻO koʻu makuahine, ʻo Kainani Kahaunaele, ka mea i aʻo mai i kēia ʻike o ka puolo Hawaiʻi. Nāna i kākoʻo a paipai nui mai e hoʻomau ma kēia ala ʻo ke mele Hawaiʻi. Akā, ʻo koʻu mau hoa, nā keiki hoʻi a ka poʻe hoʻokani mele, i paipai nui mai e hoʻomau i ka hīmeni ʻana. He mau pua mākou na ka poʻe ikaika ma ka ʻaoʻao mele, no laila no mākou ke kuleana e hoʻomau i kēia hana. Ke hīmeni pū au me koʻu mau hoa me koʻu ʻohana, he wā nanea a he wā e ola ai ka ʻike ma waena o mākou.
What is one word that describes something you are excited about for the lāhui?
Holomua
What is one word that describes a pressing issue that is facing our lāhui?
Wai